Na Mwanajuma Juma.
TIMU ya Soka ya Black Sailor imetoka kidedea mbele ya timu ya Bweleo kwa kuifunga mabao 2-1 katika mchezo wa ligi daraja la Kwanza Taifa ulioendelea juzi visiwani Zanzibar.
Mchezo huo ambao ulichezwa kwenye uwanja wa Mao Tse Tung ulianza ukiwa na ushindani mkali huku Black Sailor ikipata bao la kuongoza katika dakika ya 22 kupitia kwa mchezaji wake Hassan Issa bao ambalo lilidumu hadi mapumziko.
Kuanza kwa kipindi cha pili timu hizo ziliendelea kushambuliana na Bweleo ikapata kusawazisha katika dakika ya 63 kupitia kwa mchezaji wake Haji Idrissa na kufika dakika ya 68 Black Sailor wakapata bao la ushindi lililofungwa na mchezaji wake Musatafa Vuai.
Aidha katika viwanja vyengine ligi hiyo iliendelea ambapo katika uwanja wa Mwanakombo KVZ ikaifunga Mundu mabao 3-2, uwanja wa Fuoni Majimaji ikawatambia wenyeji wa uwanja huo timu ya Ngome kwa kuwafunga mabao 2-0 wakati Tazari Kimbunga ikawafunga Polisi Bridge mabao 2-0.