Na Mwandishi wetu
WAZEE wa Baraza la Chama Cha Mapinduzi Zanzibar, wamempongeza Rais Jakaya Mrisho Kikwete kwa ufafanuzi na kuunga mkono hotuba yake katika Bunge la Katiba aliyoitoa Machi 21, mjini Dodoma
Wazee hao walifika Ikulu ya Dar es Salaam juzi kuelezea furaha yao
“Wazee wote tunakushukuru, tumefurahishwa sana na hotuba ile kwani umetoa ufafanuzi wa mambo mengi, kwa hivyo tumefika hapa kukufahamisha kuwa tumefurahishwa, tuko pamoja nawe kwa hali yoyote,” walisema.
“Tumefurahi hotuba hii imetufungua na tumefunguka hivyo tunakuunga mkono na tuko nawe katika hoja ya serikali mbili kama ilivyo katika Chama chetu,” walisema wazee hao waliongozwa na Khadija Jabir Mohammed.
Wazee wengine waliofika Ikulu ni Waziri Mbwana Ali, Juma Ame Juma, Mohammed Khamis Haji, Juma Khamis Khamis, Tabib Omar Makungu, Alchui Khamis Alchui, Abdallah Rashid Abdalla na Haji Machano Haji.
Rais Kikwete aliwashukuru wazee hao kwa kumtia moyo kwa kufika Ikulu kuelezea hisia zao.
Aliwambia takwimu zote alizotumia katika hotuba yake amezitoa kwenye ripoti ya Tume ya Jaji Warioba na kwamba hata maswali aliyokuwa akiuliza, alikuwa akiyauliza kwa nia ya kuyatafutia majibu ya misingi kama yalivyoandikwa kwenye rasimu ya Tume.