STATE HOUSE ZANZIBAR
OFFICE OF THE PRESS SECRETARY
PRESS RELEASE
Zanzibar
TAARIFA KWA VYOMBO VYA HABARI
Rais wa Zanzibar na Mwenyekiti wa Baraza la Mapinduzi Dk. Ali Mohamed Shein amemtumia Salamu za Pongezi Rais Mpya wa Misri Mheshimiwa Abdel Fattah El- Sisi kwa kuchaguliwa kuwa Rais wa Misri kufuatia ushindi wake katika uchaguzi mkuu wa nchi hiyo uliofanyika hivi karibuni.
“Wananchi wa Zanzibar wanayo furaha kujumuika na ndugu zao wa Misri katika kusherehekea ushindi wako na kushika madaraka ya Urais kuiongoza Misri” Dk. Shein amesema katika salamu hizo.
Katika salamu hizo Dk. Shein alieleza pia wakati akitambua uhusiano wa kihistoria uliopo baina ya Serikali ya Mapinduzi ya Zanzibar na Serikali ya Misri pamoja na wananchi wa nchi mbili hizo matumaini yake ni kuona mashirikiano hayo yanaimarika na kupanuliwa zaidi.
Rais wa Zanzibar na Mwenyekiti wa Baraza la Mapinduzi amemtakia Rais Abdel Fattah El-Sisi afya njema, heri na fanaka katika kuiongoza nchi yake.