Na Mwandishi wetu
MAKAMU wa Rais wa Jamhuri ya Muungano wa Tanzania, Dk. Mohammed Gharib Bilal amekutana na Rais Pierre Nkurunzinza wa Burundi katika hoteli ya Hilton Double Tree na kufanya naye mazungumzo. Rais Nkurunzinza alikuwa nchini kwa siku tatu kwa mapumziko na ameelezea kufurahishwa kuwapo Tanzania na akaeleza kuwa Tanzania na Burundi ni nchi zenye uhusiano wa kipekee na kwamba uhusiano huo umekuwepo na utaendelea kuwepo kwa miaka mingi ijayo.
Kwa upande wake, Dk. Bilal alimueleza Rais Nkurunzinza furaha yake kwa yeye kuchagua Tanzania kuwa sehemu ya mapumziko yake na familia yake na kwamba Tanzania inazo fursa nyingi za kitalii hali ambayo imewafanya viongozi wa nchi mbalimbali kupenda kuja nchini.
Dk. Bilal alimtakia safari njema Rais Nkurunzinza na kumueleza kuwa uhusiano wa Tanzania na Burundi unazifanya nchi hizo kuwa ndugu.