Na Mwajuma Juma
CHAMA Cha Karate aina ya Gojuruu Zanzibar (ZAGOKA), kimetakiwa kuendelea na juhudi zake za kuusambaza mchezo huo mijini na vijijini.
Wito huo umetolewa na Waziri asiekuwa na Wizara Maalumu Haji Faki Shaali katika hafla ya ufunguzi wa mafunzo ya mchezo huo ya siku tatu yanayofanyika katika ukumbi wa Judo Amaan Zanzibar.
Alisema kuwa pamoja na changamoto zinazowakabili viongozi katika kuendesha mchezo huo lakini wasikate tama na kuweza kurudi nyuma katika harakati zao badala yake wajipange kwa lengo la kufikia lengo na dira ya chama chao.
Alisema kuwa dira ya chama hicho ni kuweza ni kuleta na kuhamasisha maendeleo ambayo ni pamoja na kukuza uhamasishaji wa tabia njema kwa watu wa rika zote na kuwaepusha vijana na mambo maovu ambayo yatawapelekea kujiingiza katika vitendo vya matumizi ya madawa ya kulevya.
Hivyo alisema kuwa tatizo hilo haliko mjini pekee bali limo katika mitaa yote mjini na mashamba ambako nako wanatakiwa kuzisogeza huduma zao hizo.
Mapema akisoma risala katibu Msaidizi wa chama hicho Haji Kombo alisema kuwa chama chao kinakabiliwa na changamoto mbali mbali ikiwemo ukosefu wa eneo la kufanyia mazoezi, vifaa vya mazoezi na ofisi yenye hadhi pamoja na ukosefu wa taaluma ya kukiendeleza chama hicho.
Mafunzo hayo ya siku tatu yanaendeshwa na Mkufunzi kutoka Afrika Kusini ambae ni Rais wa Shirikisho la mchezo huo Kimataifa Sensie Bakkies Laubscher.